Астанадағы Highvill тұрғын үй кешенінде Nazarbayev University пәтерінен табылған антикварлық қаруға қатысты қылмыстық іс қозғалды, деп хабарлайды Todayinfo ақпарат агенттігі.
21 сәуірде Мәжіліс депутаты Мұрат Әбенов әлеуметтік желіде Астанадағы Highvill тұрғын үй кешенінде екі шетелдіктің ұсталғаны туралы мәлімдеді. Оның айтуынша, олар қару-жарақ қоймасымен «Nazarbayev University пәтерінде» ұсталған. Ол кезде полиция департаменті қарудың тұрғын үй кешеніне әкелінгенін, бірақ оның антикварлық екенін атап өткен болатын. Сарапшылардың қорытындысы бойынша, ол қазіргі заманғы жауынгерлік қаруға жатпайды. Тұрғындарға қауіп төнгені анықталмады.
Мәжілістің жалпы отырысы кезінде Әбенов бұл жағдайды еске салып, ІІМ өкілінен азаматтардың антикварлық қаруды пәтерде сақтауға құқығы бар-жоғын сұрады.
Nazarbayev University-де қару табылған еді. Оны сақтауға арналмаған пәтерде, пәтер иелері емес адамдардың қару ұстауға құқығы бар ма? Өткен жолы сіздер ақпаратты терістеген едіңіздер. Сонда адамдар қарумен көшеде жүруге болады деп түсінді. Бірақ мен мұны дұрыс мәлімдеме деп санамаймын. Осы сұрақтарға жауап беруіңізді сұраймын, — деді мәжілісмен.
Ішкі істер вице-министрі Санжар Әділов депутатқа қырағылығы мен полицияны хабардар еткені үшін алғыс айтты.
Расымен де, осы хабарлама бойынша біз жұмыс істедік. Жедел-тергеу тобы шығып, заңға сәйкес қылмыстық іс қозғады, қаруды тәркіледі. Қазіргі уақытта мен сізбен тікелей байланыстамын. Мен сот сараптама орталығының мамандарына қосымша үлкен, кешенді сараптама тағайындауды тапсырдым. Нәтижелерін күтейік, мен сізге міндетті түрде баяндаймын, — деді вице-министр.
Ол қаруға қатысты құжаттардың да тексерілетінін қосты. Әділов тергеу құпиялылығына сілтеме жасап, істің басқа мән-жайларын ашпады.
