Іле Алатауы ұлттық паркінің 30 жылдық мерейтойы аясында Қаскелең орманшылығында «Журналистер аллеясы» ашылып, халықаралық «Парктер шеруі – 2026» акциясы кеңінен ұйымдастырылды, деп хабарлайды Todayinfo ақпарат агенттігі.
«Журналистер аллеясы» – бұқаралық ақпарат құралдары өкілдерінің табиғатты қорғауға қосқан үлесін айшықтайтын ерекше бастама. Аллеяның ашылуы журналистердің қоғамдағы экологиялық сананы қалыптастырудағы рөлін көрсетіп, табиғат пен адам арасындағы байланысты нығайтуға бағытталды. Шара барысында БАҚ өкілдері өз қолдарымен ағаш көшеттерін отырғызып, қоршаған ортаны қорғауға үлес қосты.
Табиғатты қорғауға арналған ауқымды шараға журналистер, экологтар, еріктілер, блогерлер мен студенттер қатысып, ағаш көшеттерін отырғызды. Бұл – табиғатқа деген жанашырлықтың, экологиялық мәдениеттің және ортақ жауапкершіліктің айқын көрінісі.
Жыл басынан бері ұлттық парк аумағында бірқатар экологиялық шаралар өткізілді: 270-ке жуық экологиялық акция ұйымдастырылып, оған 90 мыңға жуық адам қатысты.
Сонымен қатар, 1000-ға жуық құс ұясы орнатылып, 21 тонна қоқыс жиналды және 14 146 көшет отырғызылды.
«Журналистер аллеясы» – тек ағаш отырғызу емес, бұл болашаққа қалдырылған ізгі із.
