Алматы облысындағы «Oi-Qaragai» тау курортында Іле-Алатауы мемлекеттік ұлттық табиғи паркінің 30 жылдығына арналған «Еуразиядағы тау экожүйелерінің сақталуы мен тұрақты дамуы» халықаралық ғылыми-тәжірибелік конференциясы өтті.
Ауқымды іс-шараға Қазақстанның барлық өңірлерінен, сондай-ақ Түркия, Ресей, Қырғызстан және Өзбекстаннан келген ғалымдар, сарапшылар, табиғат қорғаушылар мен мемлекеттік орган өкілдері қатысты.
30 жылда 5 миллионнан астам ағаш отырғызылған
1996 жылы құрылған Іле-Алатауы ұлттық паркінің аумағы бүгінде 200 мың гектардан асады. Осы уақыт ішінде орман қорын қалпына келтіру жұмыстары жүйелі жүргізіліп, 5 миллионнан астам ағаш көшеті отырғызылған.
Мамандардың айтуынша, табиғатты қорғау шараларының нәтижесінде қар барысы, қоңыр аю, тас сусары, бүркіт секілді сирек жануарлардың саны тұрақты өсім көрсетіп отыр.
Үлкен Алматы шыңына 30 жылдықтың туы тігілді
Конференция барысында ерекше акция ұйымдастырылды. Ұлттық парк инспекторлары тікелей телемост арқылы теңіз деңгейінен 3684 метр биіктіктегі Үлкен Алматы шыңына ұлттық парктің 30 жылдық мерейтойлық туын орнатты.
Бұл шара парк қызметкерлерінің табиғатты қорғаудағы еңбегінің символына айналды.
Болашаққа жолданған үндеу: уақыт капсуласы 20 жылға сақталмақ
Мерейтой аясында «Болашақ ұрпаққа мұра» атты уақыт капсуласы жер қойнына тапсырылды.
Капсулаға табиғатты қорғау, экологиялық жауапкершілік және ұрпақ сабақтастығы туралы маңызды үндеулер салынып, оны 20 жылдан кейін ашу жоспарланған.
Ғалымдар климат өзгерісі мен экотуризм мәселесін талқылады
Конференцияның ғылыми бағдарламасында тау экожүйелерін сақтау, сирек жануарларды қорғау, климаттық өзгерістердің әсері және ұлттық парктердегі тұрақты туризмді дамыту мәселелері көтерілді.
Сарапшылар табиғатты қорғау мен туризм арасындағы тепе-теңдікті сақтау қазіргі кезеңдегі басты міндеттердің бірі екенін атап өтті.
Сиверс алмасына арналған соқпақ ашылды
Мерейтойлық іс-шаралар Түрген филиалындағы Кузнецов шатқалында жалғасты. Мұнда академик Аймақ Жанғалиевтың ғылыми мұрасына арналған мемориалдық-ақпараттық орталық ашылып, мәдени алмалардың арғы тегі саналатын Сиверс алмасына арналған ғылыми-танымдық соқпақ пайдалануға берілді.
47 туристік маршрут және 94 инвестициялық жоба
Соңғы 30 жылда ұлттық парк аумағында 47 туристік маршрут абаттандырылып, 94 инвестициялық жоба жүзеге асырылған.
Келушілер саны да жыл сайын артып келеді. Мамандар мұны табиғи туризмге деген қызығушылықтың өсуімен байланыстырады.
Іле Алатауы тек қорық емес, экономикалық ресурсқа айналып келеді
Бүгінде ұлттық парк тек табиғатты қорғау нысаны ғана емес, ғылыми зерттеулердің, экологиялық ағартудың және туризмнің маңызды орталығына айналды. Халықаралық конференцияда көтерілген мәселелер Еуразия елдерінің ортақ экологиялық қауіп-қатерлерге қарсы бірлесіп әрекет ету қажеттігін тағы бір мәрте көрсетті.
Іле Алатауының 30 жылдық мерейтойы өткенге есеп беру ғана емес, болашақтағы табиғатты сақтау стратегияларын айқындайтын маңызды кезең ретінде бағалануда.
