Иранның Ислам революциясы сақшылары корпусы (ИРСК) америкалық бесінші буынды F-35 жойқыш ұшағын атып түсіргенін мәлімдеді. АҚШ Қорғаныс министрлігі бұл оқиғаға қатысты түсінік берді, деп хабарлайды Todayinfo ақпарат агенттігі.
Иранның Fars агенттігі таратқан ИРСК мәлімдемесіне сәйкес, америкалық жойқыш ұшаққа Иранның орталық бөлігінде соққы берілген. Оқиға бейсенбі күні таңғы сағат 02:50-де болған.
"АҚШ армиясының F-35 жойқыш ұшағына ИРСК аэроғарыш күштерінің жаңа озық әуе қорғанысы кешені соққы жасап, оған айтарлықтай зақым келтірді", - делінген ресми хабарламада.
Сақшылар корпусы ұшақтың тағдыры белгісіз екенін, бірақ оның құлау ықтималдығы жоғары екенін жеткізді. Ирандық әскерилер бұл оқиғаның тарихта тұңғыш рет тіркеліп отырғанын айтады. Сондай-ақ, Иранның мемлекеттік телерадиокомпаниясы ұшақтың зақымданған сәті делінген видеоны жариялады, алайда оның түпнұсқа екені әлі расталған жоқ.
Өз кезегінде Пентагон өкілі америкалық F-35 жойқыш ұшағының Иран әуе кеңістігінде жауынгерлік тапсырманы орындағаннан кейін Таяу Шығыстағы әуе базаларының біріне шұғыл қонғанын растады.
"Бізге АҚШ-тың F-35 ұшағы Иран үстіндегі жауынгерлік тапсырманы орындаған соң аймақтық әуе базасына апатты жағдайда қонғаны туралы хабарламалар белгілі. Ұшақ сәтті қонды, ұшқыштың жағдайы тұрақты. Осы оқиғаға байланысты тергеу жүріп жатыр", - деп жауап берді Пентагон ресми сауалға.
F-35 — америкалық Lockheed Martin корпорациясы әзірлеген, көзге аз түсетін, бесінші буынға жататын көпфункционалды жойқыш ұшақтар тобы.
Фото: depositphotos.com
