Ирак президенті Низар Амиди ресми түрде Али аз-Зейдиді елдің премьер-министрі етіп бекітіп, оған 30 күн ішінде жаңа үкімет құруды тапсырды, деп хабарлайды Todayinfo ақпарат агенттігі.
Аз-Зейдидің кандидатурасын шиит саяси күштерінің коалициясы болып табылатын ірі парламенттік бірлестік – Үйлестіру кеңесі ұсынды. Президент өзінің X әлеуметтік желісінде: «Конституциялық өкілеттіктеріміз аясында біз ең ірі парламенттік блоктың үміткері Али аз-Зейдиге жаңа үкімет құруды тапсырдық», – деп жазды.
Али аз-Зейди елдің қоғамдық-саяси өміріндегі көрнекті тұлға. Оның кәсіби жолы қаржы саласымен, ғылыми қызметпен және медиасектормен байланысты. Қазіргі уақытта ол Ұлттық холдингтік компанияның директорлар кеңесін басқарады.
Осыған дейін, қаңтар айында Үйлестіру кеңесі премьер-министр лауазымына бұрынғы үкімет басшысы Нури әл-Маликиді ұсынған еді. Бұл шешім АҚШ президенті Дональд Трамптың сынына ұшырап, ол Иракқа көрсетілетін көмекті қысқартумен қорқытты. Әл-Малики бұл мәлімдемені ішкі істерге араласу және мемлекеттің егемендігін бұзу деп бағалады.
2003 жылдан кейінгі саяси жүйе бойынша Иракта президент лауазымын дәстүрлі түрде күрд халқының өкілі, парламент спикерін сүннит, ал премьер-министрді шииттер қатарынан тағайындайды.
