Алматыда ЛГБТ-белсендісі Әмір Шайкенжановты бағыныштысын ауырлататын мән-жайларда зорлады және АИТВ жұқтыру қаупін төндірді деп айыптады.
Медеу аудандық сотында Әмір Шайкенжановқа қатысты қылмыстық іс ҚР ҚК 120-бабы 1-бөлігі және 118-бабы 1-бөлігі (жәбірленушінің дәрменсіз күйін пайдаланып зорлау, басқа адамды АИТВ жұқтыру қаупіне әдейі ұшырату) бойынша жабық режимде қаралды.
Сот 2025 жылғы наурызда ол әдейі әрекет етіп, өз қызметкеріне психофизиологиялық жағдайға әсер ететін белгісіз затты тұтынуды ұсынып, сол арқылы оны дәрменсіз күйге келтіргенін анықтады. Осыны пайдаланып және ерікті келісімнің болмауына қарамастан, ол жәбірленушімен оның еркіне қарсы жыныстық қатынасқа түсті.
Сондай-ақ, Әмір Шайкенжановтың адамның иммун тапшылығы вирусы (АИТВ) бар екенін біле тұра, жәбірленушімен жыныстық қатынасқа түсіп, оны жұқтыру қаупіне ұшыратқаны атап өтілді.
Айыпталушының кінәсі іс бойынша жиналған дәлелдемелермен, жәбірленушінің айғақтарымен және бейнежазбамен расталды.
«Айыпталушы Әмір Шайкенжанов кінәсін мойындамады. Жәбірленуші бас бостандығынан айыру түріндегі жаза тағайындауды сұрады. Прокурор қылмыстық құқық бұзушылықтардың жиынтығы бойынша 5 жыл 4 ай бас бостандығынан айыру жазасын тағайындауды сұрады. Жауапкершілікті жеңілдететін және ауырлататын мән-жайлар анықталмады. Әмір Шайкенжанов тағылған айыптар бойынша кінәлі деп танылды. ҚК 118-бабының 1-бөлігі бойынша (қылмыстық теріс қылық) ол ескіру мерзімінің өтуіне байланысты жауапкершіліктен босатылды», – делінген Алматы соттарының хабарламасында.
ҚК 120-бабының 1-бөлігі бойынша (ауыр қылмыс) Әмір Шайкенжановқа 5 жыл бас бостандығынан айыру жазасы тағайындалды.
