Түркістан облысының Шілік ауылында шақал екі адамға шабуыл жасады. Әлеуметтік желілерде жыртқыштың құрбаны екі жасар қыз бен ер адам болғаны айтылады.
Облыс әкімдігінің мәліметінше, ветеринарлық қызмет үлгілерді алып, шақалдың құтыру ауруына шалдыққанын тексеріп жатыр. «Зардап шеккендер аудандық орталық ауруханаға жүгініп, құтыруға қарсы профилактикалық вакцинациядан өтті. Олардың жағдайы тұрақты, дәрігерлердің бақылауында. Бір адам ауруханада ем қабылдап жатыр», — деді ведомство өкілдері.
Шабуыл болған аумақ пен зардап шеккен тұрғындардың аулалары дезинфекцияланды — бұл жануардың құтыру ауруымен ауырған жағдайда қауіпсіздік шарасы ретінде жасалды.
