2026 жылдың сәуірінде айлық инфляция 0,8%-ды құрады. Азық-түлік тауарларының бағасы 0,7%-ға, азық-түлік емес тауарлар мен ақылы қызметтер 0,9%-ға өсті, деп хабарлайды Todayinfo ақпарат агенттігі.
Ұлттық статистика бюросы жариялаған ақпаратқа сәйкес, азық-түлік тауарлары арасында банан мен апельсин бағасы 3%-ға, көкөніс пен үрмебұршақ 0,6%-ға, зефир 0,5%-ға, кептірілген өрік 0,4%-ға арзандады. Жүзім 5,6%-ға, сары май мен карамель 1,2%-ға, картоп 0,8%-ға, сүзбе 0,6%-ға, рулеттер мен кекстер 0,4%-ға, лимон мен жасымық 0,3%-ға қымбаттады.
Азық-түлік емес тауарлардан кір жуғыш машиналар 1,2%-ға, парацетамол 0,8%-ға, жанаспалы линзаларға арналған ерітінді 0,7%-ға, блендер 0,6%-ға, теледидарлар 0,4%-ға арзандады. Қол сағаттарының бағасы 4%-ға, цемент 2,4%-ға, жеке гигиена тауарлары 1,5%-ға, жуғыш және тазалағыш құралдар 0,7%-ға өсті.
Ақылы қызметтер саласында туристерді медициналық сақтандыру 1,9%-ға арзандады. Клининг қызметтері 0,8%-ға, косметолог қызметтері 0,7%-ға, компьютер мен ноутбук жөндеу 0,3%-ға қымбаттады.
Бюроның хабарлауынша, 2026 жылдың сәуірінде жылдық инфляция 10,6%-ды құрап, наурызбен салыстырғанда 0,4 пайыздық тармаққа бәсеңдеді. Азық-түлік емес тауарлардың бағасы 11,7%-ға, азық-түлік тауарлары 11,3%-ға, ақылы қызметтер 8,9%-ға өсті.
Жылдық көрсеткіш бойынша қырыққабат 24,4%-ға, сарымсақ 7,8%-ға, қызылша 4,7%-ға, банан 1,7%-ға арзандады. Ал алмұрт 10,8%-ға, бал 9,1%-ға, мармелад 7,6%-ға, ашытқы 7%-ға, құмшекер 4,2%-ға қымбаттады.
Бір жыл ішінде үтік бағасы 20,7%-ға, тіс пастасы 14,6%-ға, зарядтау құрылғылары 6,8%-ға, дастархан 6,4%-ға, ас үй пышағы 2,5%-ға өсті. Сонымен қатар, заңгерлік қызметтер 10%-ға, байланыс қызметтері 3,2%-ға қымбаттады.
