Көрмеге кел: Димаш Құдайбергеннің 70 музыкалық аспабы бар болып шықты

Алматыдағы Ықылас атындағы халық музыкалық аспаптар музейінде әлемге танымал әнші Димаш Құдайбергеннің жеке коллекциясынан құралған «Димаш: бір дауыс – мың ел» атты көрмесі ашылды. Әншінің өзі қатысқан салтанатты шарада оның жеке қорындағы 70-ке жуық музыкалық аспап көпшілік назарына ұсынылды, деп хабарлайды Todayinfo ақпарат агенттігі. Экспозицияда Димаштың әлемнің түкпір-түкпіріндегі жанкүйерлері сыйға тартқан бірегей аспаптармен қатар, оның сахналық костюмдері де қойылған. Көрермендердің ерекше назарын аударған жәдігерлердің бірі – поп-мәдениет жұлдызы Майкл Джексоннің жеке стилисі Гоко Залдидің Димашқа арнап тіккен сахналық киімі болды. Көрменің ең әсерлі сәттерінің бірі – Димаштың музей қорына жеке екі домбырасын табыстауы. Оның бірі – әншіге атасы сыйлаған, бала күнінен серік болған аспабы. Осылайша, өнер иесі өзі үшін ең қымбат дүниелерін халқымен бөлісті. Өз кезегінде музей ұжымы Димашқа ұлы Абай Құнанбайұлының домбырасының дәл көшірмесін сыйға тартты. Әншінің әкесі Қанат Айтбаев бұл көрменің ұлттық өнерді ұлықтап, әлем халықтарының музыкалық мұрасын бір жерге тоғыстырған маңызды бастама екенін атап өтті. Ал анасы Светлана Айтбаева жәдігерлердің отбасы үшін рухани құндылығына тоқталды.

"Бұл аспаптар біз үшін өте ыстық. Себебі бұл – әлемнің әр түкпірінен жиналған, түрлі халықтың ұлттық мұрасын танытатын құнды дүниелер. Әрқайсысының өзіндік тарихы бар. Осы аспаптарды тарту еткен барша азаматқа алғысымыз шексіз", - деді Светлана Айтбаева.

«Димаш: бір дауыс – мың ел» көрмесі бір ай бойы жалғасады. Ол Алматы қаласы, Зенков көшесі, 24а мекенжайында орналасқан Ықылас атындағы халық музыкалық аспаптар музейінде өтеді. Фото: Алматы әкімдігі