Меркіде туристке пышақ сұққан күдікті 7 жылға дейін бас бостандығынан айырылуы мүмкін

Жамбыл облысының Меркі ауданында орын алған ауыр құқық бұзушылық бойынша ішкі істер органдары тергеу амалдарын бастап кетті, деп хабарлайды Todayinfo ақпараттық агенттігі. Оқиға жанармай құю бекетінде орын алып, шабуыл жасаған күдікті суық қару – пышақ қолданған. Жәбірленуші – мототурист Шымкентке бет алған сапарында шабуылға ұшыраған. Аталған дерек бойынша ҚР Қылмыстық кодексінің 293-бабы 3-бөлігі (бұзақылық, суық қару қолдану) бойынша қылмыстық іс қозғалды. Бұл бап 7 жылға дейін бас бостандығынан айыру жазасын қарастырады. Күдікті оқиға орнынан бой тасалағанымен, жедел іздестіру шараларының нәтижесінде ұсталып, сот санкциясымен қамауға алынды. Қазіргі таңда қылмыстық іс Жамбыл облысы Полиция департаментінің Тергеу басқармасының өндірісіне қабылданып, арнайы жедел-тергеу тобы құрылды. ІІМ орталық аппаратының мамандары да Меркіге жіберілді. Ведомствоның хабарлауынша, оқиғаның жан-жақты және толық тергелуі қамтамасыз етіледі. Сонымен қатар, жәбірленушінің қауіпсіздігі үшін адвокаттың өтінішімен оған полиция қызметкерлері тарапынан күзет қойылған. Тергеу барысы ҚР Ішкі істер министрінің ерекше бақылауында. ІІМ хабарлауынша, тергеу нәтижесіне және қадағалау органының келісіміне байланысты күдіктінің әрекетін басқа бап бойынша қайта саралау мүмкіндігі қарастырылуда. Бұл оның жазасына әсер етуі ықтимал.