Ғылым және жоғары білім министрлігі негізгі ҰБТ-2026-ға өтініш қабылдауды аяқтағанын хабарлады. Тестілеу 10 мамырдан басталып, 10 шілдеге дейін жалғасады, деп хабарлайды Todayinfo ақпарат агенттігі.
Ведомствоның мәліметінше, тестілеуге қатысу үшін 240 мыңға жуық талапкер өтініш берген, ал екі әрекетті ескергенде 446 мыңнан астам өтініш қабылданған. Салыстыру үшін, 2025 жылы 216 мыңға жуық талапкер қатысуды жоспарлаған, ал өтініштердің жалпы саны 399 мыңды құраған.
Қатысушылардың көпшілігі қазақ тілін таңдаған – 73 пайыз, 27 пайызға жуығы орыс тілінде, 521 адам ағылшын тілінде тест тапсырады. Ең танымал бейіндік пәндер комбинациясы – «Математика-Физика», оны 17,9 пайыз қатысушы таңдаған. Тағы 14,5 пайыз «Биология-Химияны», 12,4 пайыз «Шығармашылық емтиханды» таңдаған.
Министрлікте 2026 жылы тестілеу форматы өзгеріссіз қалатынын атап өтті. Талапкерлер үш міндетті пән және таңдау бойынша екі бейіндік пән тапсырады, тапсырмалардың жалпы саны – 120. Максималды нәтиже – 140 балл. Тестілеу уақыты – 4 сағат (240 минут), ерекше білім қажеттіліктері бар балалар үшін қосымша 40 минут қарастырылған.
Түсу үшін ең төменгі шекті баллдар сақталады: ұлттық ЖОО үшін 65 балл, басқа ЖОО үшін 50 балл, «Педагогикалық ғылымдар» және «Құқық» бағыты бойынша 75 балл, «Денсаулық сақтау» бағыты бойынша 70 балл. Бейіндік пәндер бойынша кемінде 5 балл, ал «Оқу сауаттылығы» және «Математикалық сауаттылық» бойынша кемінде 3 балл жинау қажет.
Емтиханның ашықтығын қамтамасыз ету үшін кіре берісте металл іздегіштер, аудиторияларда байланыс сигналдарын басатын жүйелер мен бейнебақылау қолданылады. Тестілеу аяқталғаннан кейін 31 қазанға дейін бейнежазбаларға талдау жүргізіледі. Бұзушылықтар анықталған жағдайда ҰБТ нәтижелері, сондай-ақ білім гранттары жойылады.
