Ресейдің Краснодар өлкесіндегі Туапсе қаласында орналасқан мұнай өңдеу зауытына түнгі дрон шабуылынан өрт шықты. Бұл туралы өңірлік жедел штаб Telegram-да хабарлады, деп хабарлайды Todayinfo ақпарат агенттігі.
Жедел штабтың мәліметінше, өрт ұшқышсыз ұшу аппараттарының сынықтарының құлауынан пайда болған. Оқиға салдарынан ешкім зардап шеккен жоқ. Өртті сөндіруге 122 маман мен 39 техника жұмылдырылды, оның ішінде ТЖМ бөлімшелері де бар.
Туапсе әкімі Сергей Бойко бұған дейін дрон шабуылы қаупі режимін енгізген болатын. Ескерту төрт сағаттан астам уақыт бойы күшінде болды. Осы кезеңде қалалық мектептердің бірінде тұрғындарға арналған уақытша орналастыру пункті ашылды. Ұқсас ескерту Новороссийск қаласында да жарияланды.
29 сәуірге қараған түні Краснодар, Геленджик және Сочи әуежайларында ұшуларға шектеулер енгізілді. Кейін әуежайлардың жұмысы толық қалпына келтірілді. Бұған дейін, 16 және 20 сәуірде, Туапседегі теңіз терминалына шабуылдар жасалып, ірі өрттер тіркелген еді.
Сол шабуылдардың салдарынан акваторияда шамамен 10 мың шаршы метр аумақты қамтыған мұнай дағы табылып, Туапсе өзеніне мұнай өнімдері төгілген. 27 сәуірдегі жағдай бойынша мамандар үш учаскеде 4 мың текше метрден астам ластанған топырақ пен мазут қоспасын жинады. Тазарту жұмыстары терминал аумағында, өзен сағасында және жағалау бойында жалғасуда. Ластануды оқшаулау үшін бондық қоршаулар мен мұнай ұстағыштар орнатылды.
