Үкіметте өткен брифингте ҚР Цифрлық даму вице-министрі Ростислав Коняшкин журналистердің жеке куәлікті онлайн алу кезінде ЦОН жүйесінің фотосуреттерді қабылдамауына қатысты сұрақтарына жауап берді, деп хабарлайды Todayinfo ақпарат агенттігі.
Оның айтуынша, жеке куәлікті қайта рәсімдеу пилоттық режимде іске қосылған. «Иә, кез келген жаңа өнімді іске қосқанда сынақ кезеңі болатынын мойындаймыз. Біз әлі де фотосурет сапасын талдайтын модельді тестілеп, жетілдіріп жатырмыз. Бұл – қазіргі таңдағы жалғыз проблемалық тұс. Осыған байланысты онлайн қайта рәсімдеу үлесі 50 пайыздан төмен. Біз технологияны деректер массивінде пысықтап жатырмыз. Сәтті және сәтсіз жағдайлар бар. Толық сенімді болғанда ғана пилоттық жоба аяқталды деп жариялаймыз», – деді вице-министр.
«Бұл – бірнеше күн немесе апта емес, бірнеше айлық жұмыс. Қазірдің өзінде кейбір ЦОН-дарда өзіне-өзі қызмет көрсету терминалдары орнатылған, олар арқылы құжаттарды ыңғайлы әрі қарапайым түрде қайта рәсімдеуге болады. Биыл ЦОН-дардың жаңа форматы аясында бұл тәжірибені кеңейтуді жоспарлап отырмыз», – деп қосты Коняшкин.
Вице-министр бұл қызмет көрсету уақытын айтарлықтай қысқартып, кезектерді азайтатынын атап өтті.
