Қазақстанда жеке куәлікті онлайн қайта рәсімдеу қызметі пилоттық режимде жұмыс істей бастады, бірақ әзірге бұл толыққанды балама бола алмай отыр, деп хабарлайды Todayinfo ақпарат агенттігі.
Сандық даму және инновациялар вице-министрі Ростислав Коняшкиннің айтуынша, басты мәселе – фотосуреттерді тексеру жүйесінде. Үй жағдайында түсірілген суреттерді бағалайтын алгоритм әлі «үйреніп» жатыр, сондықтан өтінімдердің бір бөлігі қабылданбайды. Қазіргі уақытта онлайн-өтінімдердің сәтті өту үлесі 50 пайыздан төмен.
«Қазір бұл сынақтан өтуде. Модельдің дұрыс жұмыс істемейтін жағдайлары бар екенін мойындаймын, біз оны қазір түзетіп жатырмыз. Бұл бірнеше күн немесе апта емес, бірнеше айдың міндеті. Дәл осы форматта қызметті жыл бойы жетілдіреміз», – деді Коняшкин үкіметтегі брифингте.
Сонымен қатар, ХҚКО-ларда құжат рәсімдеуге арналған өзіне-өзі қызмет көрсету терминалдары енгізілуде. Билік бұл қызмет көрсетуді жеделдетіп, кезекті азайтады деп күтеді.
