Түркістанның Отырар ауданында заманауи мақта өңдеу зауыты ашылды. Жоба 180 мың тоннаға дейін өңдеп, 279 адамды жұмыспен қамтиды.
Түркістан облысы Отырар ауданына қарасты Қарақоңыр ауылдық округінде «Түркістан мақта агроөнеркәсіптік кешені» ЖШС-нің заманауи мақта өңдеу зауыты пайдалануға берілді. Жаңа нысан өңірде мақта өсіру мен оны терең өңдеуді бір арнаға тоғыстырмақ.
Бұл туралы
Todayinfo порталы хабарлайды.
Ашылу салтанатына Түркістан облысының әкімі Нұралхан Көшеров қатысып, өндіріс ұжымын және аудан тұрғындарын құттықтады. Ол ауыл шаруашылығы мен оны терең өңдеу облыс экономикасын дамытудың негізгі бағыты екенін атап өтті.
21,1 млрд теңгелік жоба және 180 мың тонна қуат
Аймақ басшысының айтуынша, серіктестік қытайлық инвесторлар көмегімен 32 мың гектар алқапқа тамшылатып суару әдісімен мақта егіп, өнімділікті арттырған. Су үнемдейтін технологиялар климат құбылып тұрған кезеңде аса маңызды болып отыр.
Жоба аясында екі бірдей мақта өңдеу зауыты салынуда. Жалпы құны 21,1 млрд теңге болатын өндірістер жылына 180 мың тонна шитті мақтаны өңдеуге мүмкіндік береді.
Қазіргі таңда 120 мың тонна шитті мақта жиналып, соның 30 мың тоннасы таза мақта түрінде өңделгені айтылды. Бұл көрсеткіштер Отырардағы мақта шаруашылығы біртіндеп өнеркәсіптік деңгейге көтеріліп жатқанын аңғартады.
Бір орталықтан 32 мың гектар: жасанды интеллект енгізілді
Мемлекет басшысы Қасым-Жомарт Тоқаев Жолдауында экономиканы цифрландыру мен жасанды интеллект технологияларын кеңінен енгізу міндетін қойғаны белгілі. Осы тапсырма аясында аталған жобаға да жасанды интеллект жүйесі қосылған.
Басқару орталығында AI арқылы бақылау, реттеу және басқару жұмыстары жүргізіледі. Бір орталықтан 32 мың гектар жер қадағаланып, суару жүйесі бір пультпен басқарылатыны көрсетілді.
Серіктестік басшысы Суй Дже облыс әкімдігінің қолдауы мен сеніміне алғыс айтып, жұмысты одан әрі күшейтетінін жеткізді.
Компания мәліметінше, 2025 жылы Отырар ауданы аумағында 23 мың гектар жерге тамшылатып суару әдісімен мақта егілген. Орташа өнімділік әр гектардан 50–60 центнер көлемінде болған.
Зауыт іске қосылғаннан кейін 279 адам тұрақты жұмыспен қамтылды. Бұл Қарақоңыр және оған жақын елді мекендер үшін табысты жұмыстың көбейіп, әлеуметтік жағдайдың жақсаруына әсер ететін нақты қадам саналады.
