Шығыс Қазақстан облысының полиция департаменті «Казцинк» ЖШС аумағында болған оқиғаға қатысты сотқа дейінгі тергеуді бастады, деп хабарлайды Todayinfo ақпарат агенттігі.
Қылмыстық іс екі немесе одан да көп адамның абайсызда өліміне әкеп соққан еңбекті қорғау талаптарын бұзуға қатысты бап (ҚК 156-бабы, 4-бөлігі) бойынша қозғалды.
«Қазіргі уақытта оқиға орнында жедел-тергеу топтары жұмыс істеп жатыр. Оқиғаның барлық мән-жайын анықтауға бағытталған алғашқы шаралар жүргізілуде», — деп хабарлады ШҚО Полиция департаменті.
5 мамыр күні таңертең кәсіпорын аумағында шаң тұтқыш құрылғының дүмпуі болып, соңы өртке және құрылымның ішінара құлауына ұласқан. Өндірістегі төтенше жағдай салдарынан екі адам қаза тауып, тағы бес адам түрлі жарақат алды.
«Қазгидромет» мамандары оқиғадан кейін жақын маңдағы тұрғын үй аудандарының ауасында зиянды заттардың шекті рұқсат етілген концентрациясынан асып кеткенін тіркеді. Сынамалардан хлорсутек, күкіртсутек және көміртек тотығының жоғары деңгейі анықталды.
«Казцинк» компаниясының хабарлауынша, қайғылы оқиғаның себептері мен мән-жайын анықтау үшін арнайы комиссия құрылды.
