Президенттікке кандидат болған экс-депутат Рақымбеков 10 жастағы асыранды қызын зорлаған

Астаналық Айбота Рақымбекованы «Ауыл» партиясы төрағасының бірінші орынбасары, экс-депутат және президенттікке кандидат болған әкесі Төлеутай Рақымбеков зорлаған. Ол 1,5 жылдан бері осы сұмдықты дәлелдей алмай жүр, деп хабарлайды Todayinfo агенттігі Orda.kz-ке сілтеме жасап. Айбота Рақымбекованың айтуынша, өзін 2006 жылы 10 жасында экс-депутат зорлаған. Мұндай жағдай екі рет болған дейді. Сондай-ақ оның анасынан қалған мұраның бір бөлігін заңсыз тартып алған. Қазір ол 1,5 жасар баласымен бірге дағдарыс орталығында тұрады. 28 жастағы Айбота әкесінің озбырлығын дәлелдей алмай жүр. Айбота – Төлеутай Рақымбеков пен Салтанат Рақымбекованың асыранды қызы. Бірақ қыз мұны тек 25 жасында білген. Оны 6 айлығында ата-анасы нағашы әжесіне тастап кеткен. 5 жасына дейін әжесінің қолында өскен. Әжесі қайтыс болған соң, 2002 жылы экс-депутаттың отбасы оны асырап алады. Шын мәнінде Салтанат Рақымбекова – оның тәтесі, яғни туған анасының сіңлісі болған. Қыз өзінің зорланғанын былтыр ғана батылы жетіп айтты. 2023 жылы қарашада Төлеутай Рақымбековтің үстінен «Кәмелетке толмағанды зорлау» бабы бойынша қылмыстық іс қозғалған.