Қазақстанда 7 миллионға жуық баланы қамтитын «Қазақстан балалары» атты жаңа ұлттық бағдарлама қабылданды. Жалпы бюджеті 2,6 млрд АҚШ долларын құрайтын бұл бастама балалардың әл-ауқатын жақсартуды көздейді, деп хабарлайды Todayinfo ақпарат агенттігі.
Президент Қасым-Жомарт Тоқаевтың бастамасымен әзірленген бағдарлама 2026-2030 жылдар аралығын қамтиды. Оның аясында балаларды әлеуметтік қорғау, денсаулық сақтау, білім беру және қауіпсіздігін қамтамасыз ету салаларында 158 нақты іс-шараны іске асыру жоспарланған.
Жаңа стратегияда отбасыларды қолдау, балалардың цифрлық қауіпсіздігін қамтамасыз ету және балаға бағытталған инфрақұрылымды дамыту сияқты маңызды бағыттарға басымдық берілген. Атап айтқанда, жаңа медициналық және оңалту орталықтары салынып, инклюзивті қызметтер ауқымы кеңейтілмек.
Бұл бағдарламаны әзірлеуде ЮНИСЕФ негізгі стратегиялық серіктес болды. Ұйым сарапшылары Балалар құқықтары туралы конвенцияның халықаралық стандарттарын ұлттық саясатқа енгізуге, сондай-ақ бағдарламаның тұжырымдамалық негіздері мен нәтижелік көрсеткіштерін әзірлеуге атсалысты.
Бағдарламаны әзірлеуге Мемлекеттік кеңесші, Бала құқықтары жөніндегі уәкіл, Оқу-ағарту министрлігі, Балалардың құқықтарын қорғау комитеті және азаматтық сектор өкілдері қатысты. Ұлттық консультациялар барысында балалардың да пікірлері ескерілді.
«Қазақстан балалары» бағдарламасы БҰҰ-ның Тұрақты даму мақсаттарына, оның ішінде денсаулық, сапалы білім және теңсіздікті қысқарту сияқты бағыттарға қол жеткізуге ықпал етеді деп күтілуде.
Фото: UNICEF/Kazakhstan/2025/Arman Mustafin
