Президент Тоқаев қытайлық Sunwah Group корпорациясының төрағасымен кездесіп, Қытаймен жасанды интеллект саласындағы ынтымақтастықты талқылады.
Президент Қасым-Жомарт Тоқаев қытайлық Sunwah Group корпорациясының төрағасы Цай Гуаньшэньді қабылдап, инвестициялық ынтымақтастық пен жасанды интеллект саласын дамытуды талқылады, деп хабарлайды Todayinfo ақпарат агенттігі.
Кездесуде Мемлекет басшысы Қазақстанның Қытаймен жан-жақты стратегиялық серіктестікті нығайтуға ерекше мән беретінін атап өтті. Сонымен қатар, 2013 жылы Астанада ҚХР Төрағасы Си Цзиньпин ұсынған «Бір белдеу, бір жол» бастамасының табысты жүзеге асып жатқанына тоқталды.
Тоқаев екі ел арасындағы сауда-экономикалық байланыстардың қарқынын жоғары бағалады.
"Қытай – Қазақстанның ең ірі сауда серіктесі. Екі ел арасындағы тауар айналымы жыл сайын рекордтық көрсеткішке жетіп отыр", – деп атап өтті Мемлекет басшысы.
Әңгіме барысында инвестиция тарту мәселесіне баса назар аударылды. Президенттің айтуынша, Қазақстан шетелдік инвесторларға қолайлы жағдай жасап, бірлескен стратегиялық жобаларға жан-жақты қолдау көрсетеді.
Кездесудегі ең маңызды тақырыптардың бірі – жасанды интеллект болды. Қасым-Жомарт Тоқаев Қытайдың бұл салада көшбасшы екенін мойындап, ынтымақтастықты дамытуға ниетті екенін білдірді.
"Әлем қазір жасанды интеллектінің белсенді даму кезеңіне өтті, бұл салада Қытай көш бастап тұр. Біз осы бағытта ынтымақтастықты дамытуға мүдделіміз", – деді Президент.
Цай Гуаньшэнь – Қытай Халықтық саяси консультативтік кеңесі Бүкілқытайлық комитетінің Тұрақты комитет мүшесі және Гонконгтағы Қытай бас сауда палатасының төрағасы.
Фото: Әлеуметтік желіден
