Қазақстанда ЭЦҚ кілтін қайта шығару қиындады: енді SMS-код не eGov Mobile арқылы растау керек

Қазақстанда электрондық цифрлық қолтаңба (ЭЦҚ) кілттерін қайта шығару тәртібі өзгерді: енді қосымша тексеру кезеңі міндеттелді. Жаңалық pki.gov.kz порталындағы жеке кабинет арқылы кілттерді қайта шығаратын азаматтарға тікелей қатысты. Бұл туралы Todayinfo порталы хабарлайды. Жаңа талаптың мәні – жүйе ЭЦҚ-ны қайта шығарғанда міндетті түрде жеке тұлғаның кім екенін екі тәсілдің біреуімен растауды сұрайды. Мақсат – кілтті бөтен біреулердің заңсыз қайта шығарып алу қаупін азайту.

Кім екенін растаудың 2 жолы

Бірінші нұсқа – SMS-код. Яғни бір реттік құпиясөз Мобильді азаматтар базасында (МАБ) тіркелген телефон нөміріне келеді. Екінші нұсқа – eGov Mobile қосымшасындағы цифрлық код. Қосымшада көрсетілген кодты порталға енгізу қажет. Бұл тәсіл әсіресе қауіпсіздік тұрғысынан маңызды: егер біреу сіздің деректеріңізді біліп қойса да, смартфоныңызға қол жеткізбей ЭЦҚ-ны қайта шығару қиындайды.

Қазақстандықтарға не істеу керек

Егер сіз ЭЦҚ-ңызды жиі жаңартып немесе жоғалтып қайта шығаратын болсаңыз, алдын ала МАБ-та телефон нөміріңіз тіркелгенін тексерген дұрыс. Телефон нөмірі өзекті болмаса, SMS келмей қалуы мүмкін. Сондай-ақ eGov Mobile қосымшасын орнатып, аккаунтты белсендіріп қойған ыңғайлы. Себебі растаудың бір тәсілі жұмыс істемей қалса, екіншісі көмектеседі. Жалпы, өзгеріс қазақстандықтардың цифрлық қызметтерін қауіпсіз қолдануына бағытталған: ЭЦҚ – банк, eGov және түрлі онлайн-қызметтерде қашықтан қол қоюдың негізгі құралы болғандықтан, қосымша қорғаныс артық етпейді.