Қазақстандағы банктерде проблемалық несиелер айтарлықтай көбейді – жаңа дерек

Ұлттық банк мәліметіне сай, қараша айында 90 күннен астам төленбей жатқан несие сомасы 93,8 млрд теңгеге көбейген. Осылайша банктердің жалпы несие қорындағы проблемалық қарыздардың үлесі 3,74%-ға жетіп отыр (қазан айының басында бұл көрсеткіш 3,54% болған). Бұл жағдай әсіресе ірі қаржы ұйымдарында байқалып, банктердің қаржылық тұрақтылығына әсер етуі мүмкін. Бұл туралы Todayinfo.kz ақпарат агенттігі хабарлайды. Есепке сай, ең көп өсім Halyk Bank-та тіркеліп отыр — проблемалық қарыз көлемі 72 млрд теңгеге артып, 438 млрд теңгеге жеткен. Бұл банк портфелінің 3,39%-ын құрайды. Ал қазан айында бұл көрсеткіш 2,82% болған. Bereke Bank-та да өсім айтарлықтай — 7,7 млрд теңге қосылып, жалпы көлемі 107,8 млрд теңгеге жетті (7%). Еуразиялық банкте – 5,8 млрд теңге өсіп, проблемалы несие көлемі 139,3 млрд теңгеге дейін жеткен (8,31%).

Қай банктердің жағдайы алаңдатарлық?

Проблемалық несиелердің ең жоғары үлесі бойынша Еуразиялық банк (8,31%) пен Alatau City Bank (8,09%) алдыңғы қатарда тұр. Сондай-ақ, Bank RBK мен ForteBank та өз портфельдерінде айтарлықтай өсімді көрсетті: тиісінше 3,6 млрд және 2,7 млрд теңгеге артқан. Сарапшылардың айтуынша, аталған көрсеткіштердің артуы несие нарығындағы тәуекелдердің ұлғайғанын көрсетеді, бұл өз кезегінде елдің қаржы жүйесіне де әсер етуі мүмкін.

Бұл тұрғындарға қалай әсер етеді?

Мұндай жағдай несие алушылар үшін талаптардың қатайып, пайыздық мөлшерлемелердің өсуіне себеп болуы мүмкін. Сол себепті, қарыз алушылар жеке қаржыларын басқаруға мұқият болғаны жөн.