Қазақстанның үш қаласында әскери техника жүреді: министрлік мәлімдеме жасады

Қорғаныс министрлігі Қазақстанның үш қаласында әскери техниканың қозғалысы болатынын ескертті. Ведомствоның хабарлауынша, бұл жоспарлы тексеріс аясында ұйымдастырылып отыр, деп хабарлайды Todayinfo ақпарат агенттігі. Министрліктің мәліметінше, Қарулы күштердің әскери басқару органдары мен әскери бөлімдеріне жоспарлы тексеріс басталған. Осыған байланысты 16-18 ақпан аралығында Алматы, Қонаев және Талдықорған қалаларында әскери техниканың орын ауыстыруы байқалады.

«Осыған байланысты 16-18 ақпан аралығында Алматы, Қонаев және Талдықорған қалаларында әскери техника қозғалысы болады. Автомобиль жолдарының жекелеген учаскелерінде қозғалыс уақытша шектелуі мүмкін», - делінген Қорғаныс министрлігінің дүйсенбі күні таратқан ресми хабарламасында.

Осыған орай, қорғаныс ведомствосы азаматтарды, бұқаралық ақпарат құралдарының өкілдері мен әлеуметтік желі қолданушыларын жалған ақпаратқа сенбеуге шақырды. Министрлік тек ресми дереккөздерге сүйенудің маңызды екенін атап өтті. Фото: Әлеуметтік желіден