«Қажеті болмас»: Кәрім Мәсімов құпия түрде Назарбаевқа хат жазған

Фото: коллаж Todayinfo.kz Кәрім Мәсімовтың Нұрсұлтан Назарбаевқа жазған хаты пайда болды. Ол ҚР Премьер-министрі болып тұрғанда елде әлемдік деңгейдегі спорт жарысын өткізуге қарсы болған. Мәсімовтың сол кездегі  Президент Нұрсұлтан Назарбаевқа Алматыда қысқы Универсиада өткізуге қарсы екенін білдіріп, арнайы хат жолдағаны белгілі болды, деп хабарлайды Todayinfo.kz ақпарат агенттігі. Мәсімов өз пікірін Алматы әкімі Ахметжан Есімовтің ұсынысынан кейін білдірген. Есімов сол кезде Алматының 2017 жылғы Қысқы Универсиаданы өткізуге кандидатурасын қолдап, халықаралық федерацияға ресми кепілдік хат жіберуді сұраған. Алайда Премьер-министр бұл ұсынысты құптамаған. Хатта Мәсімов Универсиаданы өткізудің ел үшін тиімділігі төмен екенін атап өтеді. Оның жазуынша, бұл шараға кемінде 50 елден мыңдаған спортшы мен делегат келеді, ал халықаралық талапқа сай 3000 адамға арналған арнайы «Универсиада ауылын» салу қажет. Сондай-ақ жаңа спорт нысандарын тұрғызу және қолданыстағыларын толық жаңғырту міндеті бар. Жарияланған хатта Мәсімов Универсиада өткізудің талаптары мен ықтимал шығындары туралы егжей-тегжейлі баяндап, Президенттен нақты шешім сұраған. Осы шығындарды тізіп шыққан. Яғни Мәсімов Президентке шараны өткізбеу керектігін жанама түрде жеткізген. Мәсімов хатында ЭКСПО-ны өткізу шарасы тұрғандықтан, Қысқы универсиада қажет емес деп шешкен. Оның бұл ұсынысын Президентте қолдаған. Бірақ Президент пен сол кездегі Үкімет басшысы қолдамаса да, халықаралық қауымдастықтың дауыс беруімен Алматы Қысқы Универисаданы өткізу құқығын жеңіп алған. Айта кетейік, Қысқы Универсиаданың өтуіне дайындық барысында Алматы қаласында «Алматы арена», «Халық арена» сынды ірі спорт нысандары салынып, еліміздегі спорттың дамуына едәуір үлесін қосты деп айтуға болады.