6 мамырға қараған түннен бастап әлеуметтік желілерде «Қорғас» шекара маңы ынтымақтастығы халықаралық орталығына, атап айтқанда Нұр Жолы өткізу пунктіне жақын маңда түсірілген деген болжаммен видеолар тарауда. Кадрларда ондаған жүк көлігінің жанып жатқаны анық көрінеді, деп хабарлайды Todayinfo ақпарат агенттігі.
Әлеуметтік желі қолданушылары көліктермен бірге тіркемелердегі тауарлар да өртеніп кеткенін жазуда. Қытай билігі шығын көлемі мен жүк көліктерінің ішіндегі заттар туралы әзірге ресми мәлімдеме жасаған жоқ.
Сонымен қатар, қазақстандықтар көліктермен бірге Қытайдан келе жатқан тауарларының да өртеніп кеткенін жаза бастады. Кәсіпкер Динара Меңдібаева әлеуметтік желіде жеті тонна жүгінен айырылғанын хабарлады.
Бұл – көпшілігіңіз төлеп, күтіп отырған тапсырыстар. Мен таңғалдым және қазір жұмыс істеген уақытымдағы ең қиын сәттердің бірін бастан өткерудемін. Бұл – орасан зор қаржылық шығындар, жұмсалған күш, уақыт және денсаулық.
Жетісу облысының Төтенше жағдайлар департаменті өрттің 4 мамырда болғанын хабарлады. «Бұл ретте «101» және «112» шұғыл қызметтерінің пульттеріне хабарламалар түскен жоқ, өйткені бұл аумақ Қытай Халық Республикасына тиесілі», — деді ТЖД.
Зардап шеккендер мен өрттің себептері туралы әзірге хабарланған жоқ. Бұған дейін редакция Алматы облысында ірі қойманың өртенгені туралы жазған болатын. Өртті сөндіру кезінде металл шатыр ішінара опырылып, өрт ошағына жетуді қиындатқан.
