Қырғызстан Ұлттық қауіпсіздік комитетінің бұрынғы төрағасы Қамшыбек Ташиев қызметінен босатылғаннан кейін елге оралды. Ол 13 ақпанға қараған түні Бішкектегі «Манас» халықаралық әуежайына қонды, деп хабарлайды Todayinfo ақпарат агенттігі.
Бұған дейін, 10 ақпанда Қырғызстан президенті Садыр Жапаров арнайы жарлықпен Қамшыбек Ташиевті министрлер кабинеті төрағасының орынбасары – Ұлттық қауіпсіздік комитетінің төрағасы қызметінен босатқан еді.
Президент әкімшілігі бұл шешімнің негізгі мақсаты – мемлекеттің тұтастығын сақтап, қоғамдағы, әсіресе мемлекеттік құрылымдар арасындағы ықтимал алауыздықтың алдын алу екенін мәлімдеді.
Кейінірек президенттің баспасөз хатшысы кикілжіңге Ташиевтің өзі емес, оның жақын айналасы себеп болғанын айтты. Оның сөзінше, Ташиевтің серіктестері депутаттарға хабарласып, оларды «генералдың жағына өтуге» және «президент сайлауын қайта бастауға» үгіттеген.
Қамшыбек Ташиевтің өзі шетелге президенттің рұқсатымен, бұрын жасалған отадан кейінгі тексерілу үшін барғанын жеткізді. Ол қызметтен кету туралы жаңалықты күтпегенін мойындады.
"Бұл мен үшін күтпеген жағдай болды. Дегенмен, мемлекет басшысының шешімі орындалуы керек", - деді Ташиев.
Фото: Әлеуметтік желіден
