Шавкат Рахмоновтың жұбайы жол апатына қатысты күдікті атанды

Аралас жекпе-жек шебері Шавкат Рахмоновтың жұбайы Гулайым Рахмоноваға қатысты жол-көлік оқиғасы бойынша қылмыстық іс аясындағы тергеу жалғасып жатыр. Ішкі істер министрінің орынбасары Санжар Әділовтің айтуынша, аталған іс бойынша Гулайым Рахмонова күдікті ретінде танылған. Қазіргі таңда тараптар тергеу материалдарымен танысу сатысынан өтіп жатыр. Жол апаты 2025 жылдың 27 шілдесінде Алматы–Екатеринбург тасжолының 299-шақырымында тіркелген. Алдын ала мәліметтерге сәйкес, Toyota Land Cruiser 200 маркалы автокөлікті басқарған Гулайым Рахмонова көлікті игере алмай, соның салдарынан көлік аударылған. Апат салдарынан екі әйел оқиға орнында қаза тауып, спортшының жұбайы мен оның баласы медициналық мекемеге жеткізілген. Дәрігерлер олардың жағдайын орташа ауыр деп бағалаған. Кейінірек Жамбыл облысы полиция департаменті апат орнынан түсірілген бейнежазбаны жариялап, кадрларда көліктің қатты зақымданғаны, бір дөңгелегінің жұлынып кеткені және бөлшектердің жан-жаққа шашылғаны анық көрінетінін хабарлаған. Коллаж: cmn.kz