Мемлекет басшысы Қасым-Жомарт Тоқаев Жапонияда үлкен жетістікке жеткен кәсіпқой сумошы Ерсін Балтағұлды қабылдады, деп хабарлайды Todayinfo ақпарат агенттігі.
Президент спортшыны жақында өткен Император кубогында сумо күресіндегі жоғары дәреже саналатын «маэгасира» атағын жеңіп алуымен құттықтады. Сонымен қатар ол жарыс қорытындысы бойынша «Канто-сё» (жауынгерлік рух) арнайы жүлдесіне ие болған.
Мемлекет басшысы бұл марапатты сумошының табандылығы мен еңбекқорлығының нәтижесі деп атады. Тоқаевтың айтуынша, қазір шетелде ел намысын абыроймен қорғап жүрген жас отандастарымыздың қатары көбейіп келеді. Ол мемлекет таланттарды қолдауға және спортты дамытуға ерекше көңіл бөлетінін атап өтті.
«Жапонияға сапарым барысында Сізді императордан бастап қарапайым адамдарға дейін көпшілігі танитынын, құрметтейтінін байқадым. Бұл – үлкен мәртебе. Жапонияда тұрып, қазақ халқын әлемге танытып, еліміздің абыройын асқақтатып жүрсіз. Сізге ерекше ризашылығымды білдіремін», - деді Мемлекет басшысы.
Ерсін Балтағұл өз кезегінде Президентке қолдауы үшін алғыс айтып, жас спортшылармен кездесу өткізуді жоспарлап отырғанын жеткізді.
«Мен Қазақстан азаматы ретінде халқының саны 120 миллионнан асатын Жапонияда еліміздің көк байрағын лайықты деңгейде танытуды мақсат еттім. Осы мақсатқа жету үшін бар күшімді салып жатырмын. Сондай-ақ Сізді және барша қазақстандықты отандасымыз Михаил Шайдоровтың жасөспірімдер арасындағы Қысқы Олимпиада ойындарында алтын медаль жеңіп алуымен шын жүректен құттықтағым келеді», - деді Ерсін Балтағұл.
Кездесу соңында Президент балуанға халықаралық жарыстарда жаңа белестерді бағындыруына тілектестік білдірді. Оның жетістіктері еліміздің беделін арттырып, Қазақстан мен Жапония арасындағы достық байланыстарды одан әрі нығайтуға ықпал ететінін атап өтті.
Фото: Әлеуметтік желіден
