Түркия Президенті Ердоған Қазақстанның жаңа министрін қабылдады

Қазақстанның Сыртқы істер министрі Ермек Көшербаев Анкараға ресми сапармен барып, Түркия Президенті Режеп Тайып Ердоғанның қабылдауында болды, деп хабарлайды Todayinfo ақпарат агенттігі. Кездесу барысында Түркия басшысы екі ел арасындағы кеңейтілген стратегиялық серіктестіктің қарқынды дамып келе жатқанына ризашылығын білдірді. Ол көпсалалы өзара іс-қимылды жан-жақты нығайтудың маңызы зор екенін атап өтті. Өз кезегінде Ермек Көшербаев Президент Қасым-Жомарт Тоқаевтың сәлемін жеткізіп, бұған дейін жоғары деңгейде қол жеткізілген келісімдердің орындалу барысы туралы баяндады. Тараптар бауырлас екі елдің қарым-қатынасын одан әрі нығайту жолдарын талқылады. Сондай-ақ халықаралық ұйымдар, әсіресе түркі интеграциясы аясындағы өзара сенім мен қолдауға негізделген ықпалдастықты жоғары бағалады. Кездесуде жаһандық және өңірлік мәселелер бойынша екі елдің ұстанымы ұқсас екені айтылды. Фото: Әлеуметтік желіден