Үйлерге терезе салуға тыйым салынды: ауған әйелдеріне қатысты тағы бір қатал жарлық шықты

Ауғанстан әйелдеріне тағы бір тыйым салынды. Талибанның жоғарғы көшбасшысы Хайбатулла Ахунзада әйелдердің жүріп-тұрғаны көрінетін тұрғын жайларға терезе салмауға жарлық шығарды. Оның бұйрығының мәтінін тәліптердің өкілі Забиулла Муджахид твиттерде жариялады, деп хабарлайды Todayinfo «Настоящее время» басылымына сілтеме жасап. Жарлыққа сай, үйдің ауласын, асханасын, әдетте әйелдер жүретін құдықтың айналасын көруге болмайды, сондықтан енді жаңа ғимараттарға терезе салуға тыйым салынды.

«Асханада тамақ жасап, құдықтан су тасып жүрген әйелдерді көру әдепсіз қылықтарға жетелеуі мүмкін», делінген құжатта.

Муниципалды органдар мен басқа да тиісті органдар жаңа стандарттардың сақталуын қамтамасыз ету үшін жаңа ғимараттардың салыну барысын қадағалауға міндетті. Егер терезе салынса, үй иелері қабырға тұрғызса да жауып тастауға тиіс. Тәліптер Ауғанстан билігіне 2021 жылы келді, содан бері елдегі әйелдердің құқықтары толықтай дерлік шектелді. ЮНЕСКО-ның дерегінше, Ауғанстанда 1,4 миллион қыз баласы білім алу құқығынан айырылды.