Украина президенті кеңсесінің бұрынғы басшысы Андрей Ермак Киев маңында элиталық тұрғын үй құрылысы арқылы 460 миллион гривенді (шамамен 10,5 миллион АҚШ доллары) жылыстатты деген күдікке ілінді, деп хабарлайды Todayinfo ақпарат агенттігі.
Украинаның сыбайлас жемқорлыққа қарсы ведомстволары Киев маңында элиталық тұрғын үй құрылысы кезінде 460 миллион гривенді заңдастыруға қатысы бар ұйымдасқан топты әшкерелегенін мәлімдеді.
Күдікті ретінде Владимир Зеленский кеңсесінің бұрынғы басшысы Андрей Ермак танылды. Ол қараша айының соңында «Миндичгейт» жемқорлық дауына байланысты қызметінен босатылған болатын. Содан бері оған ешқандай күдік тағылған жоқ еді.
Украинаның Ұлттық сыбайлас жемқорлыққа қарсы бюросы (ҰСЖҚБ) мен Арнайы сыбайлас жемқорлыққа қарсы прокуратура (АСЖҚП) Ермактың «Киев маңындағы элиталық құрылыста 460 миллион гривенді (шамамен 10,5 миллион доллар) заңдастыруға қатысы бар ұйымдасқан топтың» мүшелерінің бірі болуы мүмкін екенін мәлімдеді.
Күдік қылмыстық жолмен алынған мүлікті заңдастыру (жылыстату) бабы бойынша тағылған.
ҰСЖҚБ мәліметінше, құрылыс «Династия» коттедж қалашығында жүргізілген. Тимур Миндич пен Украинаның бұрынғы вице-премьері Алексей Чернышев кіретін кәсіпкерлер мен саясаткерлер тобы жеке тұру үшін төрт жеке резиденцияны сатып алуға келіскен деп болжанады.
Әр резиденцияның ауданы шамамен 1 мың шаршы метрді, ал құны шамамен 2 миллион долларды құрайды. Резиденциялар жалпы ауданы 8 гектардан асатын жер учаскелерінде салынған, олардың құны 6 миллион доллардан асуы мүмкін екенін сыбайлас жемқорлыққа қарсы ведомстволар мәлімдеді.
ҰСЖҚБ мен АСЖҚП нұсқасы бойынша, 2021-2025 жылдары резиденциялардың болашақ иелері мен басқа да тұлғалар құрылыс кезінде шамамен 9 миллион долларды жылыстатқан.
Ермак бұл жағдайға қатысты түсініктеме беруден бас тартты.
