Астанада Қазақстан Республикасындағы Ресей Федерациясының Мәдениет күндерінің ашылуы өтті, оның аясында Ресей өнер шеберлерінің гала-концерті ұйымдастырылды.
Іс-шараның құрметті қонақтары Қазақстан Республикасының Мемлекеттік кеңесшісі Ерлан Қарин, Премьер-Министрдің орынбасары – Қазақстан Республикасының Мәдениет және ақпарат министрі Аида Балаева, Ресей Федерациясы Мәдениет министрінің орынбасары Андрей Малышев, сондай-ақ екі елдің дипломатиялық корпусы мен шығармашылық зиялы қауым өкілдері болды.
Гала-концерт бағдарламасында бүкілресейлік және халықаралық байқаулардың лауреаты Софья Онопченко, башқұрт фолк-тобы «Ay Yola», «Саха (Якутия) Республикасының Мәдениет үздігі» құрметті атағының иегері Олена Уутай және басқалардың орындауындағы хореографиялық, аспаптық және вокалдық-аспаптық композициялар ұсынылды. Көрермендер қалмақ халық музыкасы мен бурят халық әндерінен де ләззат ала алды. Кештің ерекше көркі Мәскеу мемлекеттік академиялық «Гжель» би театры, Дағыстанның академиялық еңбек сіңірген «Лезгинка» би ансамблі және Қалмақияның «Ойраты» мемлекеттік би театрының өнер көрсетуі болды.
Айта кетейік, Қазақстандағы Ресей Федерациясының Мәдениет күндері бағдарламасы екі ел арасындағы мәдени-гуманитарлық ынтымақтастықты одан әрі нығайтуға бағытталған іс-шараларды қамтиды. Мәселен, бүгін Қазақстан Республикасының Ұлттық музейінде «Мәдени дәстүрлер мен заманауи шығармашылық тәжірибелерді біріктіру: Қазақстан мен Ресейдің мәдени ынтымақтастығы» атты дөңгелек үстел өтті, онда жаңа бірлескен жобалар талқыланды. Сонымен қатар, астанада Қазақстандағы Ресей киносының фестивалі ашылды, оның көрсетілімдері 26 сәуірге дейін жалғасады. Мәдениет күндерінің ашылуының шарықтау шегі Ресей өнер шеберлерінің гала-концерті болды.
Жарты жыл бұрын Ресейде Қазақстанның Мәдениет күндері сәтті өтті. Көрермендер Ә.Қастеев атындағы Қазақстанның Ұлттық өнер мұражайының жинағынан «Қазақстан өнерінің жауһарлары» көрмесімен танысып, Қазақстан киносының күндеріне қатысып, «Парасат майданы» спектаклін көре алды. Қазақстандық бағдарламаның шарықтау шегі Үлкен театр сахнасында Қазақстан өнер шеберлерінің гала-концерті болды – бұл Мемлекет басшыларының қатысуымен өткен және көрермендерден кеңінен жауап алған оқиға.
