Ішкі істер министрлігі «Заң және тәртіп» қағидаттарын іске асыруды жалғастыруда, деп хабарлайды Polisia.kz. Сәуірдің екінші онкүндігінде жедел-іздестіру іс-шаралары барысында құқық қорғау органдары есірткінің аса ірі көлемдегі заңсыз айналымының екі фактісін анықтап, жолын кесті.
Абай облысында полиция қызметкерлері жедел ақпаратты өңдеу барысында 21 жастағы жүргізушіні ұстады. Оның автокөлігін тексеру кезінде таратуға дайындалған екі келіден астам гашиш майы табылып, тәркіленді. Тергеу деректері бойынша, жас жігіт есірткі интернет-дүкенінің кураторының нұсқауымен әрекет етіп, шоғырландырылған затты сатумен айналысқан.
Тағы бір факт елордалық өңірде тіркелді, онда онлайн-платформалар арқылы есірткі таратты деген күдікке ілінген 26 жастағы әйел ұсталды. Жеке қарау және жалдамалы тұрғын үйді тексеру кезінде одан бір келіден астам A-PVP синтетикалық заты, сондай-ақ электронды таразылар, орау материалдары және орауға арналған жүзден астам зип-пакеттер табылды.
Барлығы заңсыз айналымнан 45 мыңнан астам бір реттік дозаға тең келетін есіртті мөлшері тәркіленді.
Қазіргі уақытта сотқа дейінгі тергеу жүргізілуде. Құқық қорғау органдары тыйым салынған заттарды жеткізу арналарын, оларды тарату схемаларын, сондай-ақ қылмыстық әрекетке байланысты ақша қаражатының көздері мен қозғалысын анықтауда. Күдіктілер уақытша ұстау изоляторына орналастырылды.
ІІМ мұндай сату арналарының жолын кесу қоғам қауіпсіздігіне тікелей әсер ететінін және ең алдымен жастарды есірткі қаупінен қорғауға бағытталғанын атап өтті. Есірткі желілерін анықтау және жою жұмыстары олардың бүркемелеу тәсілдеріне қарамастан – нақты ортада да, интернетте де жалғасатын болады.
Фото: скриншот
