Қарағанды облысында прокуратура, әкімдік өкілдері мен студенттер бір күн бойы құтқарушылардың жұмысымен танысып, төтенше жағдайлардың ортасында болды, деп хабарлайды Todayinfo ақпарат агенттігі.
«Құқық тәртібі әліппесі» деп аталған бұл шара «Заң және тәртіп» идеологиялық бағыты аясында ұйымдастырылған. Оның басты мақсаты — мемлекеттік органдар жұмысының ашықтығын көрсетіп, қоғаммен тікелей байланыс орнату.
"Біздің міндетіміз — құтқарушылардың күнделікті қызметін барынша жан-жақты көрсету: олар қандай шақыруларға барады, қандай техниканы пайдаланады және қиын сәтте қалай шешім қабылдайды. Бұл формат азаматтық қорғау қызметінің шынайы бейнесін өз көзімен көруге мүмкіндік береді", - деді ТЖД басшысының орынбасары, азаматтық қорғау подполковнигі Думан Далешов.
Шараға қатысушылар №1 мамандандырылған өрт сөндіру бөлімінің жұмысымен танысып, қызмет мұражайын аралады. Алайда, ең қызықты сәттер тәжірибелік бөлімде басталды. Оларға өрт сөндірушілер жаттығатын жылу-түтін камерасы, биік ғимараттан зардап шеккен адамды арқанмен түсіру, кинологтардың итімен бірге орманда адасқан адамды іздеу және жол апатынан кейін зақымданған көліктен адамды шығару процестері көрсетілді.
Сонымен қатар, қонақтарға су асты маманының қысқы жағдайдағы жұмысы мен гидравликалық авариялық-құтқару құралдарының мүмкіндіктері таныстырылды.
Департамент мұндай іс-шараларды тұрақты өткізгенімен, прокуратурамен бірлесіп мұндай форматта алғаш рет ұйымдастырып отыр. Бұл қадам құқықтық мәдениетті дамытып, мемлекеттік органдар мен қоғам арасындағы сенімді нығайтуға бағытталған.
Фото: Әлеуметтік желіден
