Иран мен Израиль бір-бірін атқылап жатқанда, екі елдің жастары шаңырақ көтерді. Иранның соңғы шахы Мұхаммед Реза Пехлевидің 31 жастағы немересі Иман Пехлеви еврей ұлтынан шыққан кәсіпкер Брэдли Шерманға тұрмысқа шықты. Олардың тойы Парижде өтті, деп хабарлайды Todayinfo шетелдік ақпарат көздеріне сілтеме жасап.
Жастар төрт жылдан бері махаббат құрған, ал 2023 жылдың тамызында қызға ресми түрде құда түскен. Иман АҚШ-та дүниеге келген. Ол Мичиган университетін «психология» және «коммуникация» мамандықтары бойынша бітірген, қазіргі уақытта қаржы саласында жұмыс істейді. Шерман — IT-технологиялар мен электрондық сауда саласына маманданған кәсіпкер.
Ерлі-зайыптылар бір ай бұрын Нью-Йоркте заңды неке қидырған. Ол шараға тек жақын туыстары қатысқан, олардың қатарында Иманның әкесі, Иранның тақ мұрагері Реза Пехлеви де болды. Иран тақ мұрагерінің әлеуметтік желідегі парақшасында:
«Тақ мұрагері және оның отбасы шын жүректен құттықтау мен ізгі тілектер жолдаған баршаға алғыс білдіреді. Жас жұбайлар да, әсіресе, ирандықтарға ризашылығын білдіреді», – делінген.
Реза Пехлеви – Иранның соңғы шахы Мұхаммед Реза Пехлевидің тұңғышы. Ол әкесінен кейін таққа отыруы тиіс болатын. Алайда 1979 жылғы Ислам революциясынан кейін монархия жойылып, Пехлеви әулеті Ираннан кетуге мәжбүр болды. 1980 жылы әкесі қайтыс болғаннан кейін, Реза Пехлеви әулеттің басы атанды және әлі күнге дейін таққа үміткер екенін мәлімдейді. Қазіргі уақытта ол АҚШ-та тұрады және Иран оппозициясының негізгі тұлғаларының бірі саналады.
2023 жылдың көктемінде Реза Пехлеви Израильге сапар жасап, «ирандықтар мен израильдіктер арасындағы көпір орнатып, аятоллалар режиміне қарсы бірлескен қарсылық білдіру» мақсатында кездесулер өткізген болатын.
Айта кетейік, Иран мен Израиль арасында достық қарым-қатынас болмаса да, екі ел көршілес әрі тығыз серіктес болды. Шах режимі құламай тұрып, Израильдің Иранға экспорты 100 миллион доллардан асқан. Екі ел арасындағы ең тығыз байланыс — қорғаныс және қауіпсіздік саласында орнаған. Ал Иран Израильге мұнай, газ, минералды ресурстар және азық-түлік жеткізіп тұрған. Алайда 1979 жылы билікке аятолла Хомейни келіп, Израильге жаулық ұстанымын жариялап, барлық қарым-қатынасты үзген.
