Қарағанды облысы әкімінің орынбасары Әлібек Әлденей Нұра ауданындағы әлеуметтік жобалармен танысты, деп хабарлайды Todayinfo ақпараттық агенттігі.
Қарағанды облысы әкімінің орынбасары Әлібек Әлденей Нұра ауданына жұмыс сапары барысында өңірдегі әлеуметтік нысандардың жай-күйін бағалап, бірнеше маңызды жобаның жүзеге асырылу барысын қарады.
«Мемлекет басшысы ауылдың маңыздылығын ерекше атап өтіп, оны сақтаудың қажеттігін нақтылады. Ауыл – елдің іргесі, ұлттың тамыры. Осы міндеттерді орындау мақсатында Нұра ауданында бірқатар әлеуметтік нысандарды аралап шықтым», – деді ол.
Өңірдегі басты нысандардың бірі – Өнер үйі. Былтыр құрылысы басталған бұл ғимарат жыл соңына дейін пайдалануға беріледі деп жоспарланып отыр. Көпфункционалды шығармашылық орталық ретінде жұмыс істейтін Өнер үйі аудан тұрғындарына мәдени қызмет ұсынбақ.
Сондай-ақ, Байтуған ауылындағы Мәдениет үйінде жөндеу жұмыстары қарқынды жүргізілуде. Қазіргі таңда ғимараттың шатырын жаңарту ісі қолға алынған.
Президент тапсырмасына сәйкес, ауданда үш мектеп реновациялау бағдарламасына енгізілді. Соның ішінде Байтуған орта мектебінде жылыту жүйесі жаңартылып, күрделі жөндеу жұмыстарына жобалық-сметалық құжаттама әзірленген. Мектеп 500 оқушыға арналған және қазіргі таңда төрт пән кабинеті заманауи техникамен жабдықталған. Жақын арада тағы екі кабинет қажетті құралдармен қамтылады.
Былтыр облыстық бюджет есебінен 14 пән кабинеті жабдықталса, биыл тағы бес кабинетке қажетті техника сатып алынды. Бұл аудан мектептерінің жарақтану көрсеткішін 12%-ға арттырды, нәтижесінде ауылдық балалар сапалы білім алуға мүмкіндік алды.
Білім беру жүйесі оқушылардың кәсіби бағдарын айқындауға ерекше көңіл бөлуде. Әсіресе, Болат Әбдікәрімов атындағы көпсалалы колледждің жұмысы айрықша аталып өтті. 200-ден астам студент білім алатын колледж түлектері теориялық біліммен қатар, тәжірибелік дағдыларды да игеріп, еңбек нарығында жоғары сұранысқа ие болуда.
Әкім орынбасары аталған бастамалардың барлығы ауданның әлеуметтік әлеуетін арттыруға және тұрғындардың өмір сүру сапасын жақсартуға бағытталғанын атап өтті. Бұл жобалар – ұзақмерзімді даму жоспарының бір бөлігі ғана, әрі алдағы уақытта жұмыс қарқыны бәсеңдемейді.
