Қарағанды облысында өндіріс картасы күн сайын жаңа жобалармен толығуда, деп хабарлайды Todayinfo ақпараттық агенттігі.
Биылдың өзінде өңірде:
- ыстық мырыштау зауыты іске қосылды,
- «Samsung» маркалы теледидарлар мен кір жуғыш машиналардың өндірісі басталды
- HOWO ауыр жүк көліктерін шығаратын зауыттың құрылысы қолға алынды
- стартаптарға қолдау көрсететін ірі және орта кәсіпорындарға арналған КАРТЕХ орталығы ашылмақ.
Осы және өзге де бастамалар бүгін өткен брифингте кеңінен талқыланды.
Шындығында, Қарағанды облысы қазірдің өзінде еліміздің индустриялық тірегі десек артық айтпаспыз. Өткен жылы экономикалық өсу қарқыны 8,8% жетті. Бұл көрсеткіш әлі де сақталуда.
Былтыр қайта өңдеу саласында 3 триллион теңгеден астам өнім өндірдік. Бұл — жалпы өңірлік өнімнің 35%-ын құрады. Қазіргі таңда дәстүрлі металлургиямен қатар, машина жасау, резеңке және пластмасса өндірісі сынды жаңа салаларға басымдық берілуде. Соның арқасында 1400 автобус пен арнайы техника, 131 мың тұрмыстық техника, 372 мың автокөлік шинасы шығарылды. Реті келгенде айта кетейін, темір тұлпарларыңызға дөңгелек алғыларыңыз келсе, Kaspi қосымшасы арқылы Attar шинасына тапсырыс берсеңіздер болады) Әрине, мұның бәрі — тек заманауи өндіріс ошақтарының ғана емес, сол жерде еңбек етіп жүрген мамандардың еңбегінің нәтижесі.
Кез келген кәсіпорынның табысқа кенелуі — темірден түйін түйетін мықты маманға байланысты. Өңірімізде 941 өндіріс орнын мамандармен қамтамасыз ету мақсатында дуальды білім жүйесі кеңінен қолданылады. «Tengri Tyres», «KazTehna», «Silk Road Electronics» секілді компанияларда тәжірибе жинаған жастар ертеңгі күні сұранысқа ие білікті маман болып шығады. Қазірдің өзінде «KazTehna» компаниясының сұранысына сәйкес, автокөлік құралдарын сырлайтын және құрастыратын мамандықтар бойынша арнайы бағдарламаны қолға алып жатырмыз.
— Бір сөзбен айтқанда, Қарағанды облысы жаңа даму кезеңіне қадам басты: өнеркәсіп пен ауыл шаруашылығы қатар дамып, жаңа жұмыс орындары ашылып жатыр. Бұл бастамалардың бәрі халықтың тұрмыс сапасын жақсартып, өңіріміздің әлеуетін арттырады деп сенеміз. — деді облыс әкімінің орынбасары Әлібек Әлденей.
