Қарағанды облысында Мемлекет басшысының ауылдық денсаулық сақтауды жаңғырту жөніндегі тапсырмасы жүйелі түрде орындалуда. Өңірде ауыл тұрғындарына сапалы медициналық қызмет көрсетуді қамтамасыз ету мақсатында 92 жаңа медициналық нысанның құрылысы жалғасып жатыр. Олардың қатарында дәрігерлік амбулаториялар, фельдшерлік-акушерлік пункттер мен медициналық пункттер бар, деп хабарлайды Todayinfo ақпараттық агенттігі.
Облыс әкімінің айтуынша, аталған жобалар аясында медициналық инфрақұрылымды дамытуға ерекше назар аударылып отыр. 92 нысанның 51-і мемлекет меншігіне қайтарылған активтер есебінен қаржыландырылып отыр. Бұл қаражат арнайы мемлекеттік қорға түсіп, әлеуметтік маңызы бар жобаларға бағытталған.
«Мемлекет басшысы Қасым-Жомарт Тоқаевтың тапсырмасына сәйкес, ауылдық жерлердегі медицинаға басымдық беріп отырмыз. Біз тек құрылыс мәселесіне емес, сонымен қатар кадрлық әлеуетті күшейту жұмысына да назар аударамыз», – деді Қарағанды облысының әкімі Ермағанбет Бөлекпаев Өңірлік коммуникациялар қызметінде өткен брифинг барысында.
Оның айтуынша, ауылдық елді мекендердегі медициналық нысандарға маман тарту мақсатында дәрігерлерге берілетін көтерме төлем көлемі айтарлықтай ұлғайтылған. Егер бұған дейін бұл сома 1-2 миллион теңге көлемінде болса, бүгінде 8,5 миллион теңгеге дейін жеткен.
«Онда кім жұмыс істейді деген сұрақтар жиі қойылады. Біз бұл бағытта нақты қадамдар жасадық. Былтыр 62 дәрігер ауылдарға жұмысқа орналасты. Биыл тағы 70 маманды қабылдауды жоспарлап отырмыз. Сонымен қатар, көтерме төлем тек ауылдық жерлерге ғана емес, қалаларға да беріледі», – деп нақтылады өңір басшысы.
Әкімнің сөзінше, тек қана медициналық пункттер салумен шектелмей, оларды қажетті құрал-жабдықтармен жабдықтау да қарастырылған. Жаңа нысандар заманауи медициналық техникамен қамтамасыз етіліп, санитарлық талаптарға толық сай келетін болады.
Сонымен қатар, өңірде медициналық білім алған жас мамандарды ауылдық жерлерге жолдау мақсатында оқу орындарымен бірлескен бағдарлама жүзеге асырылып жатыр. Жоғары оқу орындарымен және медициналық колледждермен меморандумдар жасалып, түлектердің жұмысқа орналасуына кепілдік беріледі.
Айта кетейік, ауылдық жерлердегі алғашқы медициналық-санитарлық көмекке қолжетімділікті арттыру – денсаулық сақтау жүйесінің стратегиялық міндеттерінің бірі. Қарағанды облысында қолға алынған бұл шаралар ауыл тұрғындарының денсаулығын жақсартуға, медициналық қызмет сапасын көтеруге және жалпы өмір сүру сапасын арттыруға бағытталған.
