Фото: видео скриншот
Әлеуметтік желілерде Алматы облысы Талғар ауданының №8 арнайы мектебінде мұғалімдерден ақша жиналып жатыр деген бейнежазба тарады, деп хабарлайды Todayinfo.kz ақпарат агенттігі.
Жазба авторының айтуынша, мектеп басшылығы ұстаздардан белгісіз семинар өткізу үшін қаражат сұраған. Әкімшілік «Басқа мектептердің бәрі әлдеқашан жинап қойды» деп, педагогтарды көндіруге тырысқан. Ал қаржы беруден бас тартқандарға «мұның салдары болуы мүмкін» деген емеурін жасалған.
Осылайша, кейбір мұғалімдер өз еркімен бас тартуға қорқып, қысымға тап болған.
Айта кетейік, бұл жағдай Президенттің ұстаздардың құқықтарын қорғау және оларға қандай да бір қысым көрсетуге жол бермеу жөніндегі тапсырмасынан кейін қоғам назарын ерекше аударды.
Алайда Алматы облысының білім басқармасы бұл фактіге байланысты тексеру жүргізіп, бейнежазбада айтылған деректердің бір бөлігі расталмағанын хабарлады.
«Мектеп директоры 2025 жылғы 17 қазанда өтетін физика пәні мұғалімдеріне арналған семинарға дайындық барысында баннер әзірлеу мен оқу роботын жалға алуға көмек көрсетуді әріптестеріне ұсынған», — делінген ресми мәліметте.
Соған қарамастан, мектеп директорына Қазақстан Республикасының Еңбек кодексінің 64-бабына сәйкес қатаң сөгіс түріндегі тәртіптік жаза қолданылды.
