Алматыда карантин жарияланады

Алматының 6 ауданында карантин жарияланады. BAQ.KZ.-тің хабарлауынша, «Өсімдіктер карантині туралы» заңға сәйкес, Республикалық фитосанитариялық диагностика және болжамдар әдістемелік орталығы карантиндік нысандардың және бөгде түрлердің таралу ошақтарын анықтау мақсатында аумақты зерттеп-қарайды. Карантиндік нысандардың таралу ошақтарының шекаралары мен ауданын айқындайды.

"Оның мақсаты – қала көшелері мен даңғылдарын, саябақтар мен аулаларды зиянкестер мен арамшөптерден қорғау. Қаулыға сәйкес, карантин Алматы қаласының 6 ауданына енгізіледі. Осылайша, жүйелі зерттеу нәтижелері бойынша Алматы қаласының аумағында қаланың 6 ауданында жалпы ауданы 23, 40375 га карантиндік объектілер анықталды (Алмалы – 0,997 га, Бостандық – 2,661 га, Жетісу – 1,07 га, Түрксіб – 16,11 га, Медеу – 0,56575 га, Наурызбай – 2 га)", – делінген хабарламада.

Карантин енгізілетін аумақтар тізімінде қала көшелерінен басқа, Алматы қаласының халықаралық әуежайы, кәмелетке толмағандарды бейімдеу орталығы, №11 өрт сөндіру бөлімі, «Желтоқсан» саябағы, Орталық мәдениет және демалыс паркі, 28 панфиловшылар паркі бар. Карантин уақытында мамандар калифорниялық қалқаншалы сымыр, шығыс жеміс жемірі, мәрмәр қандаласы зиянкестерімен және жусан жапырақты ойраншөп, жіңішке жапырақты арам сояу, қызғылт жатаған у кекіре, көп жылдық ойран шөп арамшөптерімен күреседі.