Ақ үй маңында жанжал: Әлиевтің күзеті белсенділерді соққыға жықты

Вашингтонда Әзербайжан президенті Ильхам Әлиевтің күзеті мен саяси тұтқындарды қолдау акциясына шыққан белсенділер арасында төбелес болды. Наразылар президент күзеті өздеріне шабуыл жасады деп айыптады, деп хабарлайды Todayinfo ақпарат агенттігі. The Washington Post басылымының жазуынша, оқиға Ақ үйге жақын жерде орналасқан Waldorf Astoria Washington DC қонақүйінің алдында болған. Акцияға қатысқан 27 жастағы Рагим Ягублудың айтуынша, Әлиевтің кортежі келіп тоқтағанда, күзет қызметкерлері оны соққыға жыға бастаған. Ол қазіргі уақытта әкесінің Әзербайжанда саяси себептермен түрмеде отырғанын да жеткізді. Тағы бір белсенді, 35 жастағы Адиль Амрахлы қашып бара жатқанда аяғын жарақаттап алғанын айтты. Оның сөзінше, тағы бірнеше адам зардап шеккен. Алайда Әзербайжанның АҚШ-тағы елшілігі бұл жағдайды мүлдем басқаша сипаттады. Дипломатиялық миссияның мәлімдеуінше, белсенділердің өздері агрессивті әрекет еткен.

"Наразылар күзетілетін аймаққа басып кірмек болып, президент кортежінің қозғалысына кедергі келтірді және балағат сөздер айтты. Күзет қызметі тек президенттің қауіпсіздігін қамтамасыз ету үшін әрекет етті", - делінген елшілік хабарламасында.

Сондай-ақ қонақүй маңындағы аумақ америкалық арнайы қызметтер белгілеген ресми қауіпсіздік периметріне кіргені айтылады. Дәл осы күні Ильхам Әлиев Вашингтонда өткен «Бейбітшілік кеңесінің» алғашқы отырысына қатысқан. Фото: Әлеуметтік желіден