Ақтаулық прокурор Алматы әуежайында ұсталды

Ақтау қаласының прокуроры, аға әділет кеңесшісі Ерболат Әбдіровтің ұсталғаны туралы ақпарат расталды, деп хабарлайды Todayinfo.kz ақпарат агенттігі. Қадағалаушы органның берген түсініктемесінде оның Алматы әуежайында мас күйіндегі жанжал шығарғаны үшін ұсталғаны айтылады. Бас прокурорды ІІМ көліктегі полиция департаментінің әуежайдағы полиция бөлімінің қызметкерлері байқаған.

– Бұл дерек бойынша қызметтік тексеріс жүргізіліп жатыр. Оның қорытындысы бойынша қызметкерге қатысты тиісті шаралар қабылданады, – деп ақпарат таратты Маңғыстау облысының прокуратурасы.

Е.Әбдіров 1977 жылы дүниеге келген, оған қатысты ҚР ӘҚБтК-нің 440-бабы 1-бөлігі («Алкогольдік ішімдіктерді ішу немесе қоғамдық орындарға мас күйінде келу») және 434-бабы 1-бөлігі («Қоғамдық орындарда былапыт сөздер айту, азаматтарға тиісу және басқа да қоғамдық тәртіп пен адамдардың тыныштығын бұзатын әрекеттер») бойынша әкімшілік құқықбұзушылық туралы хаттама толтырылғаны белгілі болып отыр. Фото: mailim.kz