Бестөбе кентінде салынып жатқан заманауи спорт кешенінің құрылысы бекітілген жоспарға сәйкес тұрақты әрі қарқынды жүргізіліп жатыр. Құрылыс жұмыстары барлық талаптарға сай ұйымдастырылып, нысан кезең-кезеңімен аяқталуда.
Қазіргі уақытта ғимараттың қасбеті толықтай қапталып, сыртқы сәулеті заманауи архитектуралық талаптарға сәйкес қалыптастырылды. Кешен аумағында жарықтандыру жүйесі орнатылып, кешкі және түнгі уақытта тұрғындар үшін қауіпсіз әрі жайлы орта қамтамасыз етілді.
Әкімшілік блоктың ішкі әрлеу жұмыстары толық аяқталды. Қазір нысан ішінде электр желілерін реттеу, жүйелерді оңтайландыру және болашақта орнатылатын жабдықтарға қажетті инфрақұрылымды дайындау жұмыстары жүргізілуде. Бұл шаралар спорт кешенінің үздіксіз әрі қауіпсіз жұмыс істеуіне мүмкіндік береді.
Сонымен қатар негізгі спорт залында еден төсенішін төсеу жұмыстары жалғасып жатыр. Бүгінгі таңда бұл жұмыстардың шамамен 40 пайызы орындалған. Алдағы кезеңде инженерлік коммуникацияларды толық аяқтау, спорттық құрал-жабдықтарды орнату, сондай-ақ кешен аумағын абаттандыру жоспарланып отыр.
Құрылыс толық аяқталып, нысан пайдалануға берілгеннен кейін бұл спорт кешені Бестөбе кенті тұрғындары үшін маңызды әлеуметтік инфрақұрылым нысанына айналады. Кешен тұрғындарға салауатты өмір салтын ұстануға, бұқаралық спортты дамытуға, сондай-ақ түрлі спорттық іс-шаралар мен жарыстар өткізуге қолайлы жағдай жасайды деп күтілуде.
