Қазақстан экономикасында оң өзгерістер байқала бастады. Ұлттық банк төрағасы Тимур Сүлейменов Үкімет отырысында инфляцияның бәсеңдегенін және ұлттық валютаның нығайғанын ресми түрде хабарлады.
Бас банкирдің сөзінше, қараша айының қорытындысы бойынша елдегі жылдық инфляция деңгейі 12,4%-ға дейін төмендеген. Бұл – халықтың қалтасына тікелей әсер ететін баға өсімінің сәл де болса баяулағанын көрсетеді.
Баға неге әлі де қымбат?
Инфляция төмендегенімен, дүкен сөрелеріндегі баға әлі де "тістеп" тұр. Ресми деректерге сүйенсек, бағаның өсуіне ең көп үлес қосып отырған – азық-түлік тауарлары.
-
Азық-түлік: Бір жыл ішінде 13,4%-ға қымбаттаған (әлемдік бағаның өсуі және өндіріс шығындары себеп).
-
Ақылы қызметтер: 12,3%-ға өскен.
-
Азық-түлік емес тауарлар: 11,2%-ға жоғарылаған.
Дегенмен, қазан-қараша айларында коммуналдық қызмет тарифтерінің реттелуі жалпы инфляцияны тежеуге септігін тигізген.
Теңге неге күшейді?
Халықты ең көп қызықтыратын сұрақ – доллар бағамы. 2025 жылдың басынан бері теңге 2,4%-ға нығайып, қазіргі таңда 1 доллар 512,57 теңге деңгейінде саудалануда.
Тимур Сүлейменов ұлттық валютаның күшеюін екі негізгі фактормен түсіндірді:
-
Қатаң ақша-кредит саясаты: Инфляцияны ауыздықтау шаралары өз жемісін беруде.
-
Шетелдік инвесторлардың қызығушылығы: Шетелдіктер қазақстандық құнды қағаздарға белсенді түрде қаржы құюда. Мәселен, қарашаның өзінде олар нарыққа 340 млрд теңге әкелген.
Қордағы қаржы қанша?
Мемлекеттің "қауіпсіздік жастығы" саналатын алтын-валюта қоры да рекордтық деңгейге жетті. Қараша айының соңындағы жағдай бойынша жалпы халықаралық резервтер 125,7 миллиард долларды құрады. Бұл жыл басымен салыстырғанда 20%-ға көп.
-
Ұлттық қор активтері: 63,6 млрд доллар;
-
Алтын-валюта резервтері: 62,1 млрд доллар.
Бір қызығы, Ұлттық қордан бюджетке трансферт ретінде қыруар қаржы (4,9 трлн теңге) алынса да, инвестициялық табыстың жоғары болуының арқасында (13,7%) қор ортая қоймаған.
