Еңбек министрлігі дабыл қақты: жұмысшылар неден жарақат алатыны белгілі болды

Еңбек және халықты әлеуметтік қорғау министрлігі өндірістегі жазатайым оқиғалардың жиілеуіне алаңдаушылық білдіріп, оның негізгі себептерін анықтады. Ведомство 2025 жылғы жұмысты қорытындылап, алдағы жылға арналған нақты міндеттерді бекітті, деп хабарлайды Todayinfo ақпарат агенттігі. Министрлікте өткен алқа мәжілісінде еңбек қатынастары мен өндірістік қауіпсіздік саласындағы ахуал жан-жақты талданды. Талдау нәтижесі көрсеткендей, өндірістік жарақаттың басты себептері – қауіпсіздік талаптарын елемеу, технологиялық тәртіпті өрескел бұзу және қызметкерлердің біліктілігінің төмендігі.

"2025 жылы еңбек заңнамасының сақталуын бақылау күшейтілді. Алайда, жазатайым оқиғалардың алдын алу әлі де басты басымдық болып қала береді. Негізгі мәселе – кәсіпорындардағы қауіп-қатерді дұрыс бағаламау және қауіпсіз еңбек мәдениетінің төмендігі", - деп атап өтті министрлік өкілдері.

Ведомствоның хабарлауынша, өткен жылы тәуекелдерді ерте анықтауға мүмкіндік беретін цифрлық бақылау жүйелері енгізілген. Бұл шаралар жарақаттану деңгейін азайтуға ішінара оң әсер еткенімен, мәселе толық шешілмеген. Осыған байланысты, 2026 жылы министрлік бірнеше негізгі бағытқа назар аудармақ. Біріншіден, қауіпсіз еңбек жағдайларын қамтамасыз ету жүйесі толық жаңғыртылып, өндірістік тәуекелдерді басқарудың заманауи әдістері енгізіледі. Сонымен қатар, барлық кәсіпорын халықаралық қауіпсіздік стандарттарына көшірілмек. Еңбек шарттарын электронды түрде тіркейтін «Еңбек шарттарын есепке алудың бірыңғай жүйесі» де толық іске қосылады. Бұл жұмыс беруші мен жұмыскер арасындағы жауапкершілікті арттырады деп күтілуде. Фото: Әлеуметтік желіден