"Youtube мүлде ашылмайды": Қазақтелеком интернет жылдамдығына қатысты түсініктеме берді

Қазақстанда YouTube нашар жұмыс істеп жатыр деген шағымдарға байланысты «Қазахтелеком» ресми мәлімдеме жасады. Компания өкілдерінің айтуынша, қазіргі таңда интернет қызметін қалпына келтіру жұмыстары жүргізілуде. Бұл жағдай көптеген пайдаланушыға әсер етіп отыр — әлеуметтік желілерде, әсіресе Instagram парақшасында пайдаланушылар видео жүктелуінің тым баяу екенін айтып, наразылық білдіруде. Бұл туралы Todayinfo.kz ақпарат агенттігі хабарлайды. «Қазақстан бойынша интернет жылдамдығының төмендеуіне байланысты техникалық бөлім тарапынан мәселе тіркелді. Қазір мамандар қалпына келтіру шараларын жүргізіп жатыр. Қолайсыздық үшін кешірім сұраймыз. Түсіністікпен қарауларыңызды сұраймыз,» – делінген компания жариялаған хабарламада.

Интернет неге баяу жұмыс істеп тұр?

Компания кейінірек түсініктемені нақтылап, өз желісінде ақау анықталмағанын мәлімдеді. Жабдықтар тексеруден өткенімен, істен шығу белгілері байқалмаған. «Қызмет штаттық режимде көрсетіліп отыр. Дегенмен, шетелдік интернет ресурстар мен халықаралық операторларға сұраныстар жіберілді. Баяу жұмыс істеу себебі олардың тарапынан болуы мүмкін» – деп толықтырды «Қазахтелеком». Айта кетейік, былтыр қараша айында Altel, Beeline және Tele2 компаниялары интернет пен байланыс тарифтерін көтеретіндерін мәлімдеген еді.