Бүгін, 14 наурызда, Қазақстанның батыс өңірлерінде көктемнің жаршысы саналатын Амал мерекесі немесе Көрісу күні тойланып жатыр, деп хабарлайды Todayinfo ақпарат агенттігі.
Бұл – Ұлыстың ұлы күнін тойлаудың бастамасы. Ежелгі дәстүр бойынша, бұл күні жұрт қыстың қаһарынан аман-есен шыққанына шүкіршілік етіп, үлкен-кіші демей, бір-бірінің үйіне арнайы барып, көрісіп, төс қағыстырады.
Көрісуге келгендер бір-біріне «Бір жасыңмен!» немесе «Жасың құтты болсын!» деп игі тілектерін білдіреді. Бұл құттықтау адамның тағы бір көктемге аман жетіп, жасына жас қосқанын білдіреді.
Амал мерекесінің басты ерекшелігі – татулық пен бауырмалдық. Бұл күні бұрынғы өкпе-реніш ұмытылып, ағайын арасындағы татулық нығая түседі. Адамдар арасындағы сыйластық пен мейірім артады.
Фото: Әлеуметтік желіден
