Бүгін, 17 желтоқсан күні таңертең Алматыдан Астанаға бет алған Air Astana ұшағы әуежайға шұғыл оралуға мәжбүр болды. Борттағы түтінге байланысты экипаж халықаралық апат дабылын қаққан.
Оқиға таңғы қарбалас уақытта, тұрақты KC-851 рейсін орындау барысында тіркелді. Әуедегі тосын жағдай жолаушылар мен экипаж мүшелерін әбігерге салғаны сөзсіз.
«MAYDAY»: әуедегі қауіпті сигнал
Көлік министрлігінің Азаматтық авиация комитетінің мәліметінше, Airbus A321neo әуе кемесінің салонында түтін байқалған. Осыған байланысты ұшқыштар бірден ең жоғары қауіпті білдіретін «MAYDAY» сигналын берген.
Оқиға хронологиясы өте жылдам өрбіді:
-
07:38 – Экипаж апат сигналын берді;
-
07:40 – Ұшақ Алматы әуежайына сәтті қонды.
Яғни, дабыл қағылғаннан кейін небәрі 2 минут ішінде лайнер жерге қонып үлгерген.
Жолаушылар зардап шекті ме?
Ең бастысы – адам шығыны жоқ. Алдын ала деректер бойынша, борттағы жолаушылар мен экипаж мүшелері дін аман.
Ұшақ қонған сәтте Алматы әуежайының ұшу-қону жолағында өрт сөндіру және авариялық-құтқару қызметтері дайын тұрды. Мамандар қауіпсіздік шараларын толық қамтамасыз етті.
Тексеріс басталды
Қазіргі уақытта оқиғаның нақты себебін анықтау үшін көліктегі оқиғаларды тексеру департаментінің қызметкерлері жұмысқа кірісті. Түтіннің неден шыққаны және техникалық ақаудың себебі арнайы комиссияның қорытындысынан кейін белгілі болады.
Айта кетейік, әуедегі мұндай жағдайлар жіті бақылауды талап етеді. Жақында ғана Scat әуе компаниясының ұшағы да борттағы жолаушының денсаулығы нашарлауына байланысты Ақтөбеге кері қонған болатын. Өкінішке қарай, ол оқиғада жолаушы көз жұмған еді. Ал бүгінгі жағдай сәтті аяқталды.
