Қарағанды түбінде апатқа ұшыраған жойғыш ұшақ: Қорғаныс министрлігі түсініктеме берді

Қарағанды облысында әскери оқу-жаттығу кезінде Су-30СМ жойғыш ұшағы апатқа ұшырады, ұшқыштар катапульта жасап үлгерген, деп хабарлайды Todayinfo ақпарат агенттігі. Қорғаныс министрлігінің ресми мәліметінше, оқиға 25 ақпан күні жоспарлы ұшу кезінде болған. Әуедегі жаттығу сәтсіз аяқталып, заманауи жойғыш ұшақ жерге құлаған. Екі ұшқыш та аман-есен. Қазір олар дәрігерлердің бақылауында, денсаулықтарына ешқандай қауіп төніп тұрған жоқ.

"Экипаж мүшелері дер кезінде катапульта жасап үлгерді. Ұшқыштар аман, қазір дәрігерлердің бақылауында. Апат орны қоршауға алынды, елді мекендер мен азаматтық нысандарға зақым келген жоқ", - делінген министрлік хабарламасында.

Оқиғаның себеп-салдарын анықтау үшін Қорғаныс министрлігі арнайы комиссия құрды. Комиссия құрамына авиация саласының тәжірибелі мамандары кірген. Тергеу қорытындысынан кейін оқиғаға құқықтық баға беріледі. Фото: Әлеуметтік желіден