Қарағанды және Павлодар облыстарындағы дала өрті 45 мың гектарға жетті

Төтенше жағдайлар министрлігі Қарағанды облысындағы дала өртін сөндіру бойынша жағдайды баяндады.  Министрлік мәліметінше, табиғи өртті сөндіру бойынша барлық қажетті шаралар қабылдануда. Өрт шыққан аймаққа жақын Айыр, Шөптікөл, Қызылшілік, Атантай, Теректі елді мекендеріне қауіп жоқ. Төтенше жағдайлар вице-министрі Ерлан Нұрпейісов қазір Қарағанды облысында жүр.  Далалық өрт сөндіру штабтары жұмысын жалғастыруда. Алдын ала бойынша ақпарат ашық аумақта ауданы 35 мың гектар құрғақ шөп жанып жатыр. Министрлік мәліметінше, қатты екпінді жел, таулы жерлер және өрт ошақтарына кіру жолдарының болмауы өртті сөндіруді қиындатуда. Өртті сөндіруге Қарағанды облысы ТЖД және жергілікті атқарушы органдарының күштері мен құралдарынан 386 адам, 64 бірлік техника, төтенше жағдайлар министрлігі мен қорғаныс министрлігінің әуе кемелері жұмылдырылған. Әуе кемелері өрт ошақтарына барлығы 30 рет 50-ден астам тонна көлемінде су төкті. Қарағанды және Павлодар облыстарының шекара аумағындағы өрттің жалпы ауданы 45 мың гертарды құрады. Еске салсақ, бұған дейін Қарағанды облысында дала өртін сөндіру кезінде 33 жастағы қызметкердің қаза тапқаны туралы жазған едік.