Қарағанды облысының 90 жылдығына орай өңірдегі ең ірі тарихи-өлкетану музейі 13 жылда алғаш рет ауқымды жаңартудан кейін есігін айқара ашты, деп хабарлайды Todayinfo ақпарат агенттігі.
Жаңартылған музейдің салтанатты ашылуына облыс әкімдігі, Мәдениет және ақпарат министрлігінің өкілдері, ғалымдар мен зиялы қауым өкілдері қатысты. Бұл соңғы онжылдықтағы ең ірі мәдени жаңғырту жобаларының бірі болып отыр.
Енді келушілер жәдігерлерді жай тамашалап қана қоймай, тарихқа заманауи технологиялар арқылы тереңірек үңіле алады. Экспозициялық залдар тақырыптық инсталляциялармен, интерактивті аймақтармен, голограммалармен және проекциялық жүйелермен толықтырылған. Сенсорлық экрандар арқылы архивтік құжаттармен танысып, сирек кездесетін экспонаттар туралы толық ақпарат алуға мүмкіндік жасалған.
«Біздің басты мақсатымыз – Сарыарқаның бай тарихи-мәдени мұрасын сақтап, оны қазіргі ұрпаққа заманауи технологиялар арқылы түсінікті тілде жеткізу. Бұл жаңарту өңірдің туристік әлеуетін де арттырады деп сенеміз», - деп атап өтті ұйымдастырушылар.
Музей экспозициясы 13 залдан тұрады және Сарыарқаның көшпелілер дәуірінен бастап, Тәуелсіз Қазақстанның қалыптасу кезеңіне дейінгі тарихын толық қамтиды. Археологиялық олжаларға, қола және ерте темір дәуірінің жәдігерлеріне, сондай-ақ Қарағанды облысының құрылу тарихына ерекше назар аударылған.
Музей Қарағанды қаласы, Ерубаев көшесі, 38 мекенжайында орналасқан.
Фото: Әлеуметтік желіден
